मेगू चरणय् फोरम तटस्थ मच्वनीगु

न्याक्वः तक जूगु प्रधानमन्त्रीया निर्वाचन पाखें नं प्रधानमन्त्री ल्ययेमफेवं देशय् अनिष्ट जुइत्यंगु धासें मधेशी जनअधिकार फोरमं मेगू चरणया निर्वाचनय् मतदान याइगु जूगु दु ।

आइतवाः येँय् जूगु छगू ज्याझ्वलय् फोरमया अध्यक्ष उपेन्द्र यादवं मंकाः मधेशी मोर्चाया छगू घटक फोरम मेगू चरणया निर्वाचनय् तटस्थ मच्वनीगु खुलासा यानादिल । वय्कलं ताः ई तक प्रधानमन्त्री मल्यसें देय्यात अनिर्णयया बन्दी दयेकेगु पक्षय् फोरम मदुगु धयादिल ।

राष्ट्र संरक्षण वाःपौया निक्वःगु बुदिंया लसताय् जूगु ज्याभवलय् यादवं फोरम तटस्थ मच्वनीगु धयादीसां कांग्रेस वा माओवादी सुयात समर्थन यायेगु धइगु बारे धाःसा छुं धयामदी । वय्कलं एमालेयात नं मेगू चरणय् तटस्थ मच्वनेत इनाप यानादिल ।