आजुद्यःया आगं
संस्कृतिविद् भाजु बलदेव जुजुं च्वयादीगु "वंघःया आजु द्यः व येँदे" सफूया उलेज्या जनकवि दुर्गालाल श्रेष्ठं यानादिल ।
इन्द्रचोक क्लब वंघःया नायः कृष्णमान सिंया सभापतित्वय् जूगु उगु ज्याझ्वलय् सफूया बारे न्ववानादिसें शिक्षाविद् बीरेन्द्र भक्त श्रेष्ठं सफुली बलदेव जुजुं अझ ब्यागलं दार्शनिकता न्ह्यब्वःगु खनेदु धयादिसें वंघःया आजुद्यः व येँद्यः जक मखु बिस्कं नेपाः संस्कृतिया तान्त्रिक पक्षया म्हसीका न्ह्यब्वःगु दु धयादिल ।
थःगु सफूया बारे न्ववानादिसें च्वमि बलदेव जुजुं क्लबया आग्रह कथं थम्हं थुगु सफू म्हं मफय्क नं न्ह्याकागु खँ कनादिल। लिसें सफू पिथनेत यानागु अन्वेषण अनुसन्धान पूमवंगु जुइफु धासें सफू पिथनेत घ्वानादीपिं पिकाक इन्द्र जवाहर सहयोग गुथिनिसें सकलें प्रेरणा बियादीपंत सुभाय् बियादिल ।
मू पाहांया आसनं न्ववानादिसें जनकवि दुर्गालाल श्रेष्ठं बलदेव जुजु थेंज्याःम्ह च्वमिया सफू उलेज्या याये दुगु थःगु तःधंगु ह्वःताः खः धासें वय्कः झीगु म्हसीकाया प्रतीक खः धयादिल। अथेहे सल्लाहकार विकाशभक्त श्रेष्ठं नं नुगःखँ प्वंकादिल ।
ज्याझ्वलय् न्ववासें क्लबया सल्लाहकार मोक्षबहादुर अमात्यं बलदेव जुजुया थुगु सफू न्हापाया सफूत सिबें बिस्कं कथंयागु व वैज्ञानिक दृष्टिं जाः धयादिसें थ्व सफू च्वयाः वय्कः ल्यायम्हसूपाखे लिहां झाःगु खनेदु धयादिल।
शिक्षाविद विद्यामान शाक्यं विद्यार्थीतय्त हनेगु ज्यां प्रेरणा बीगु खः धयादिसें ईयात चिउताः तयाः न्ह्याकेमाःगु खँ कनादिल ।
उगु हे ज्याझ्वलय् २०६६ सालया एसएलसी परिक्षाय् ताःलाःपिं २५ वडाया २५ म्ह विद्यार्थीतय्त हनेज्या नं जूगु खः। लिसें चीनय् जुइगु एसियन गेमय् मिसा क्रिकेट पुचःया नकिं (कप्तान) जुयादीम्ह क्लबया दुजः नीरा राजोपाध्याययात भिंतुना सगं कथं क्रिकेट ब्याट बिउगु दु। ज्याझ्वलय् लसकुस न्वचु क्लबया छ्यान्जे रजुत्तम श्रेष्ठं बियादीगु खःसा सुभाय् नायः कृष्णमान सिं यानादीगु खः ।
येँया नुगःचु थेंज्याःगु थासय् अवस्थित आजुद्यःयात आकाश भैरव नं धाः। थ्व द्यःया थःगु हे कथंया ऐतिहासिक बाखं व किंवदन्ती दु। लिसें उम्ह द्यः दुगु त्वाःयात वंघः धाःसां गनं गनं निगू खुसि स्वानाः दोभान जुयाच्वंगु 'ह्वंगः' नं धायेगु याः। सफुली थ्व फुक्कया पूर्ण ब्याख्या यानातःगु दु ।
