न्यनावंगु संस्कृति

झीथाय् संस्कृति तनावंगु बारे यक्व चर्चा जू। तर नेवाःतय् संस्कृति तनावंगु जक मखु थीथी थासय् न्यना नं वनाच्वंगु
दु। उकिया छगू दसि खः, घिन्तांघिसि ट्वाक। मूलतः घिन्तांघिसि धइगु ख्वपय् हे जक गुंलाबलय् पिहां वइगु खः। तर थुगुसी मकवानपुर जिल्लाया हेटौंडाय् नं घिन्तांघिसि पिहां वःगु खनेदु। सापारु कुन्हु सायाः पिकायेगु झ्वलय् थुगुसी हेटौंडाय् न्हापांखुसी घिन्तांघिसि नं पिकाःगु खः ।

हेटौंडाय् जक मखु थुगुसी येँय् नं घिन्तांघिसि पिहां वःगु खनेदत। थ्व नं खास यानाः सीपिनि थःथितिपिंसं मदुम्हसिया लुमंतिइ पुचः मुंकाः पिकाइगु खः। सदां नं सापारु कुन्हु ख्वपय् दकलय् आकर्षणया केन्द्र हे घिन्तांघिसि जुइगु खः। ख्वपय् घिन्तांघिसि पिहां वइबलय् उकी ख्वप चाःहिउ वयाच्वंपिं विदेशीतय्सं नं कथि संकाः ब्वति कायेगु याः। घिन्तांघिसिया थ्व यात्रायात नेवाः संस्कृतिया विस्तार धायेमाली ।