थिमिइ नं नेवाः आन्दोलन यायेत संघर्ष समिति
येँ (सन्ध्या टाइम्स)/नेवाः स्वायत्त राज्यया अवधारणा कथं स्थानीय निकायसं हस्तक्षेपकारी भूमिका म्हिताः नेवाःतय्गु माग पूरा याकेगु अभियान आः थिमिइ नं न्ह्याकेगु निंतिं संघर्ष समिति नीस्वंगु दु ।
नेवाः स्वायत्त राज्य मंकाः संघर्ष समितिं येँ महानगरपालिका, यल उपमहानगरपालिका व किपूया मंकाः परिषदं किपू नगरपालिकाय् दबाब बियाः माग पूरा यायेधुंकूगु अवस्थाय् आः मध्यपुर थिमि नगरपालिकाय् नं अज्याःगु हे माग तयाः आन्दोलन यायेगु निंतिं वंगु शुक्रवाः थिमिइ छगू तःजिगु भेला यासें नेवाः स्वायत्त राज्य मंकाः संघर्ष समिति मध्यपुर थिमि लागा नीस्वंगु खः। उगु समितिया नायः कृष्णलाल गोजा, न्वकु हरिदास प्रजापति, छ्याञ्जे कृष्णबहादुर घःजु, लिउ छ्याञ्जे नरगोविन्द शंखद्यः अले दांभरि श्याम साहु जुयादीगु दु ।
झिंस्वम्हेसिया उगु समितिइ दुजः कथं तल्सीराम दुवाल, जयकृष्ण दुवाल, नन्दकृष्ण श्रेष्ठ, विष्णुलाल मानन्धर, विष्णु श्रेष्ठ, रामकृष्ण दुवाल, शर्मीला घःजु व अमिता डंगोल च्वनादीगु दु ।
थिमिइ जूगु उगु भेलाय् नेवाः स्वायत्त राज्य मंकाः संघर्ष समितिया नायः गजेन्द्र मानन्धर, सचिवालयया कजि मल्ल के. सुन्दर अथे हे दुजःपिं विपेन्द्र महर्जन, उमेश स्थापित, डा. महेशमान श्रेष्ठ नापं मेमेपिं सहभागी जुयाः नेवाः स्वायत्त राज्यया अभ्यास यायेगु निंतिं थीथी थासय् जुयाच्वंगु आन्दोलन बारे थःथःगु बिचाः प्वंकादीगु खः।
समितिया छ्याञ्जे घःजुं छवाःया दुने मागत तयार यानाः थिमि नगरपालिकाय् माग पत्रया ज्ञापनपत्र बीगु खँ कनादिल ।
