पोखराय् प्रहरी-मजदूर ल्वापु

येँ (सन्ध्या टाइम्स)/पोखराय् थौं सुथय् प्रहरी व यातायात मजदूर दथुइ ल्वापु जुयाः तःधंगु तनाव ब्वलन। प्रहरीं थःपिनि बसयात म्वाःमदुगु द्वपं बियाः नियन्त्रणय् काल धकाः मजदूरतय्सं पृथ्वी चोकय् गाडी बेथां दिका बीवं अन चक्काजाम समेत जूगु खः ।

निघौ तक नं चक्काजाम खुले मयायेवं प्रहरीं बल प्रयोग याःगु खःसा उकिया हे दथुइ मजदूर व प्रहरी दथुइ झडप जूगु खः। बसया पुलांगु आकारयात हीकाः यातायात ब्यवसायीतय्सं बस चले यात धकाः प्रहरीं पंगु खँय् उगु ल्वापु जूगु खः। तर व्यवसायीतय्सं धाःसा यातायात व्यवस्था विभागया अनुमति कयाः हे बसया स्वरुप हीकागु खःसां प्रहरीं पंगः थनेगु नापं बसयात नियन्त्रणय् काःगु द्वपं बिउगु दु ।

समस्या समाधान यायेत थौं हे यातायात व्यवस्था विभाग, प्रहरी व यातायात ब्यवसायीतय् दथुइ वार्ता जुइगु खँ धाःगु दु ।