सङ्घीयताया विरोध याइगु दलयात प्रतिबन्ध तयेमाः : मन्त्री किराँती
संस्कृति तथा राज्य पुनसंरचना मन्त्री गोपाल किराँतीं सङ्घीयताया विरोध याइगु दलतय्त प्रतिबन्ध तेयेमाःगु बिचाः प्वंकादीगु दु ।
शुक्रवाः संस्कृति तथा राज्य पुनसंरचना मन्त्रालयं याःगु छगू ज्याझ्वलय् वयेकलं सङ्घीयताया नामय् ०१७साल दोहरे जुइगु खतरा दगु धासें गणतन्त्रयात धरापय् लाकेत छुं दलत लगेजुयाच्वंगु द्वपं बियादिल ।
'सङ्घीय स्वायत्तता गणतन्त्र - नेपा:या अपरिहार्य आवश्यकता' विषयक ज्याझ्वलय् मन्त्री किराँतीं आःया मू समस्या धइगु वर्गीय, जातीय व लिङ्गीय समस्या जूगुलिं उपेक्षित व उत्पीडित जनताया पक्षय् स्वतयत्त प्रदेश निर्माण जुइमाः धयादिल ।
ज्याझ्वलय् सभासद् सुरेश आले मागरं 'सङ्घीय स्वयत्तता गणतन्त्र - नेपाःया अपरिहार्य आवश्यकता' विषय्लय् कार्यपत्र न्ह्यब्वयादिसें सङ्घीयताया आधार धर्मया कथं मजूसें जाति, भाषा व संस्कृतिया आधारय् जुइमाःगु बिचाः प्वंकादिल । कार्यपत्रबारे सभासद् पदमलाल विश्वकर्मा, प्रा. माणिकलाल श्रेष्ठ, प्राध्यापक लालबाबु यादव लगायतं टिप्पणी यानादीगु खः ।
ज्याझ्वः संस्कृति तथा राज्य पुनसंरचना मन्त्रालयया सचिव छविराज पन्तया सभापतित्व जूगु खः ।
