भारतीय राजदूतावसं क्षमयाचना यायेमाःगु माग
थीथी संचार संगठनतय्सं भारतीय दुतावासं शुक्रवाः पिथंगु विज्ञप्ति प्रति थःपिनिगु ध्यानाकर्षण जूगु धासें उकीयात लितकयाः क्षमयाचना यायेत माग याःगु दु ।
नेपाल मिडिया सोसाइटी, टेलिभिजन व्रोडकास्टर्स नेपाल, व्रोडकाष्टिङ एसोसिएसन अफ नेपाल व सामुदायिक रेडियो प्रसारक संघं शनिवाः मंकाः रुपं प्रेस विज्ञप्ति पिथसें भारतीय दुतावासयात कुटनीतिक मर्यादा व अन्तर्राष्ट्रिय प्रेस स्वतन्त्राताया मूल्य मान्यता परिपालना यायेत धयातःगु दु ।
विज्ञप्तिइ मानव स्वास्थ्यया निंतिं संवेदनशील उपभोग्य वस्तुया गुणस्तर सम्बन्धय् नेपाः सरकारया आधिकारीक निकायं याःगु छानविन व सत्य तथ्यया विवरणया आधारय् नेपाली संचार माध्यमं पिथंगु समाचारया विषययात कयाः दक्वं नेपाःया संचार माध्यमया मानहानी जुइ कथं दुतावासं बियातःगु द्वपं आपत्तिजनक जूगु खँ न्ह्यथनातःगु दु ।
दुतावासं थःगु गल्ती महशुस यानाः तत्काल क्षमयाचना यायेत व थंज्याःगु ज्या हानं मयायेत सचेत याःगु दु । नापं विज्ञप्तिइ थंज्याःगु आपत्तिजनक ज्याया तत्काल प्रतिवाद यायेत नेपाः सरकारयात माग नं यानातःगु दु ।
