अनमिनयात लितछ्वयेगु ई मत्यानी : यादव
मधेशी जनअधिकार फोरमया अध्यक्ष उपेन्द्र यादवं अनमिनयात लितछ्वयेगु ई मत्यनीगु खँ धयादीगु दु । वय्कलं अनमिन शान्ति प्रकृयायात ग्वाहालि यायेत वःगुलिं उगु ज्या क्वमचायेकं लितछ्वये मज्यूगु धयादिल ।
रिपोटर्स क्लबं शनिवाः याःगु ज्याझ्वलय् यादवं शान्ति प्रकृयाया कार्य सम्पादन ज्या पूमवंकं अनमिनयात लितछ्वयेगु धइगु राष्ट्रसंघया अन्तराष्ट्रिय मान्यता अःख जुइगु धयादिल । अनमिनया म्याद थप यायेगु व मयायेगु बारे राजनीतिक दलतय्सं थःथःगु तरिकां व्याख्या यानाच्वंगु इलय् यादवया थ्व धापू सार्वजनिक जूगु खः ।
साक्षात्कार ज्याझ्वलय् यादवं अन्तरिम संविधान त्रुटिपूर्ण जूगु धयादिल । संसदीय मान्यता कथं दलतय् सहमतिलय् बहुमती सरकार गठन यायेगु व अथे मजुसाः तःधंगु पार्टीं सरकार निर्माण यायेगु प्रावधान दुगु खःसां अन्तरिम संविधानं उकीया व्यवस्था मयागुलिं सरकार निर्माणय् समस्या वःगु धयादिल ।
