राष्ट्रपति व प्रमुख दलया नेतात दथुइ खँल्हाबंला
राष्ट्रपति डा. रामवरण यादवं प्रमुख स्वंगू दलया शीर्ष नेतातय्त नापलाना राजनीतिक घटनाक्रमया बारे खँल्हाबंला यानादीगु दु । न्याक्वः तक जूगु निर्वाचन पाखें नं प्रधानमन्त्री ल्ययेमफुगु प्रति चिन्ता प्वंकादिसें राष्ट्रपति यादवं ताः ई तक सरकार गठन मजुसाः अर्थिक संकट वयेफुगु पाखे नेतातय् ध्यानाकर्षण याकूगु खः । यादवं नेतातय्त याकनं सहमति यानाः राजनीतिक निकास मालेत नं इनाप यानाद्यीगु खः ।
शनिवाः सुथय् राष्ट्रपति भवन शितल निवासय् जूगु खँल्हाबंलाय् एनेकपा (माओवादी), नेपाली कांग्रेस व नेकपा (एमाले)या शिर्ष नेतात पुष्पकमल दाहाल 'प्रचण्ड', सुशील कोइराला व झलनाथ खनालं वर्तमान राजनीतिक अवस्थाया बारे राष्ट्रपति यादवयात जानकारी बियादीगु खः ।
उगु इलय् माओवादी अध्यक्ष प्रचण्डं माओवादी दकलय् तःधंगु दल जूगुलिं थःगु पार्टीया नेतृत्वया सरकार गठन जुसाः याकनं शान्ति प्रकृया निष्कर्षय् थ्यनीगु दावी यानादिल । कांग्रेस कार्यवाहक सभापति सुशील कोइरालां शान्ति प्रकृया पूमवंतले कांग्रेसं सरकारया नेतृत्व यायेदयेमाःगु धयादिसें माओवादीया कारणं वर्तमान राजनीतिक गतिरोध वःगुलिं थुकीयात समाधान यायेत माओवादी हे अप्व जिम्मेवार जुइमाःगु खँ धयादीगु खः ।
एमाले अध्यक्ष झलनाथ खनालं धाःसा एमाले सहमतिय सरकारया पक्षय् दुगु व शान्ति प्रकृया पूवंकेत सहमतिय आधारय् हे सरकार गठन जुइमाःगु खँय् बः बियादीगु खः ।
