राज्य पुनसंरचना आयोग कांग्रेसयात मान्य जुइमखु : पौडेल
नेपाली कांग्रेसया उपसभापति रमचन्द्र पौडेलं थःगु पार्टी नाप सहलह मयासें राज्य पुनसंरचना आयोग गठन जूगुलिं मान्य मजुइगु खँ धयादीगु दु ।
शुक्रवाः ख्वपय् प्राविधिक शिक्षा व व्यवसायिक तालिम परिषद् कर्मचारी संघया निक्वःगु महाधिवेशनया उल्लेज्या यानादिसें वयेकलं धयादिल - 'झीसं सी हे मसीकं चांचां सहमति याना आयोग गठन याःगु खनीं । थंज्याःगु आयोग झीगू पार्टीयात मान्य जुइमखु ।'
वयेकलं सरकार व थःगु पार्टी दथुइ जूगु सहमति पालना मयासें एकलौटी ढंग निर्णय याःगु द्वपं बियादिल । सहमति कार्यान्वयन मायागुलिं पुनः संसदय् प्रधानमन्त्रीं प्रतिबद्धता प्वंकूसां उकीयात व्यवास्था याःगु धासें वयेकलं धयादिल - 'झीगू पार्टी नापलाः सहलह मयाः तर संसदय् लाः सहलह यायेमाःगु खः नि ।'
प्रधानमन्त्री पुष्पकमल दाहाल प्रचण्डं सहमति याना उकीयात ल्वमांकातुं वनाच्वंगु द्वपं बियादिल । थंज्याःगु हे ज्या यासाः कांग्रेस सरकारय् मवनेगु धयादिसें थ्वस्वयां कांग्रेस प्रतिपक्षया सकारात्मक भूमिका म्हितिगु धयादिल । नापं सहमति यानाः कार्यान्वयन मायासाः कांग्रेस आन्दोलनय् कुहांवनीगु ख्याच्वः बियादिल ।
