राष्ट्रसंघ स्थायी परिषद्या राजदूतनाप अनमिनया बारे सहलह
नेम्वाङ व ल्यानग्रेन दथुइ नं सहलह
एनेकपा (माओवादीं) राष्ट्रसंघ स्थायी परिषद्या दुजः राष्ट्रतय् राजदूतनाप अनमिनया बारे सहलह याःगु दु । शुक्रवाः सनिलय् येँया दरवारमार्गय् च्वंगु होटल याक एण्ड यतीलय् जूगु खँल्हाबंलाय् माओवादीं नेपाःया शान्ति प्रकृया पूमवंगु धासें अनमिनया म्याद तनेमाःगु खँ तःगु खः ।
थ्वहे भदौ ३० गते क्वचायेत्यंगु अनमिनया म्याद थप यायेगु निंतिं माओवादीं चीन, फ्रान्स, रुस, बेलायत व अमेरिकाया राजदूततय्त मंकाः रुपं नापलानाः अनमिनया आवश्यकताया बारे ध्वाथुइके ज्या याःगु खः ।
उखे संविधानसभा अध्यक्ष सुभाषचन्द्र नेम्वाङं अनमिन प्रमुख करिन ल्यानग्रेन नाप अनमिनया बारे सहलह यानादीगु दु । सभामुखया थःगु हे ज्याकू सिंहदरवारय् जूगु खँल्हाबंलाय् नेम्वाङं अनमिनया बारे निर्णय यायेगु अधिकार सरकार नाप जक दुगु धयादिसें सरकारं हे थुकीया बारे निर्णय याइगु खँ धयादीगु खः ।
