एमआरपी ओबर्थरयात बीगु सम्झौताय् ल्हाःचिं
मेसिन रिडेवल पासपोर्ट (एमआरपी) छापे यायेगु जिम्मा फ्रान्सेली कम्पनी ओबर्थरयात बीगु सम्झौताय् शुक्रवाः ल्हाःचिं तःगु दु । परराष्ट्र मन्त्रालयया शिष्टाचार महापाल मुक्तिनाग भट्ट व फ्रान्सेली कम्पनी ओबर्थरया एशिया व्यापार महाशाखा प्रमुख फ्लोरिन प्याकुलिनं सम्झौताय् ल्हाःचिं तयादीगु खः ।
परराष्ट्र मन्त्री सुजाता कोइरालां सम्झौताय् ल्हाःचिं तयेत अस्वीकार यायेवं सम्झौता जुइ लिबाःगु खः । सम्झौता कथं ओबर्थरं प्रति पासपोर्टया ३.५९ डलर तुइसाः नेपालं माग याःगु ४०लख पाः एमआरपी सन् २०१५या दुने छपाइ याइ ।
एमआरपी छपाइया निंतिं न्हापा भारत सरकारया नियन्त्रणय् दुगु कम्पनीयात छापे यायेगु जिम्मा बीगु निर्णय विवादय् लायेवं निक्वःगु पटक हानं टेण्डार आव्हान याःगु खः । उगु इलय् फ्रान्सेया ओबर्थर नापं बेलायत, इन्डोनेसिया व सिंगापुरया कम्पनीं टेण्डर पेश याःगु खः । प्यंगू टेण्डर मध्ये दलकय् दंकः छापे यायेगु टेण्डर लाःगु ओबर्थरयात सरकारं जिम्मा बीगु निर्णय याःगु खः ।
