स्वम्ह उम्मेदवारया स्वंगू हे प्यानल
कांग्रेस महाधिवेशन
येँ (सन्ध्या टाइम्स)/नेपाली कांग्रेसया झिंनिक्वःगु महाधिवेशनय् सभापति पदया नितिं उम्मेदवारी बिउपिं स्वम्हं हे उम्मेदवारतय्सं थःथःगु प्यानल दयेकेत्यंगु दु।
थुगुसी सभापति पदया निंतिं सुशिल कोइराला, शेरबहादुर देउवा व भिमबहादुर तामाङं उम्मेदवारी घोषणा यायेधुंकूगु दु। वय्कःपिं स्वम्हेस्यां नं थःथःगु सम्पर्क कार्यालय नं चायेकेधुंकूगु दु ।
सभापति धुंकाःया मेगु महत्वपूर्ण पद महामन्त्री खः। उकिया निंतिं नं स्वम्हं उम्मेदवारतय्सं स्वम्ह हे महामन्त्रीया उम्मेदवारत तयार याःगु दु। उकिया नापं मेमेगु पदय् नं थःथः मनूत तयाः बिस्कं बिस्कं प्यानल तयार यायेगु ज्या वय्कःपिंसं न्ह्याकेधुंकूगु दु ।
महामन्त्री पदय् सुशिल कोइरालां अर्जुन नरसिंह केसीयात, शेरबहादुर देउवां खुमबहादुर खड्कायात व भिमबहादुर तामाङं नरहरि आचार्ययात थःगु प्यानलय् दुथ्याकूगु दु।
थुगुसीया महाधिवेशनयात कांग्रेसं एकता महाधिवेशन धाःगु दुसा वर्तमान कार्यवाहक सभापति सुशिल कोइरालां थः प्यानल मदयेकुसे चुनाव ल्वायेगु धाधां हे प्यानल दयेकाच्वंगु दु खँ सूत्रं धाःगु दु ।
मेम्ह उम्मेदवार भीमबहादुर तामाङं वीपी कोइरालाया लाइन पार्टीं त्वःतावंगुलिं वहे लाइन कथं पार्टीयात न्ह्याकेत थम्हं उम्मेदवारी बियागु खँ धयाच्वंगु दु। थ्व प्यानलं थःपिंत कांग्रेसया स्वंगूगु धार धकाः दावी यानाच्वंगु कारणं थ्व पुचःयात कयाः कांग्रेस दुने विशेष चर्चा जुयाच्वंगु खनेदु ।
अथे हे मेम्ह उम्मेदवार शेर बहादुर देउवां फयांफत्तले तत्कालिन प्रजातान्त्रिक कांग्रेसया कार्यकर्तातय्त हे हानं साला कायेगु कुतः यानाच्वंगु दु। थीथी जिल्लां वय्कःया पुचलं नं चुनाव त्याका वःगु खनेदु। वइगु आश्विनया न्हापांगु वालय् कांग्रेसया झिंनिक्वःगु महाधिवेशन येँय् जुइत्यंगु दु ।
