थौं माओवादी केन्द्रीय दुजःतय् पाः
येँ (सन्ध्या टाइम्स)/एकिकृत नेकपा (माओवादी)या थन न्ह्यानाच्वंगु केन्द्रीय कमिटीया बैठकय् थनिंनिसें केन्द्रीय नेतातय्सं थःपिनि बिचाः प्वंकी। अध्यक्ष प्रचण्ड, वरिष्ठ उपाध्यक्षपिं डा. बाबुराम भट्टराई व मोहन बैद्य किरणं लिखित रुपं हे न्ह्यब्वयादीगु थःपिनि ब्यागलं ब्यागलं राजनीतिक प्रतिवेदनयात कयाः थनिंनिसें केन्द्रीय नेतातय्सं थःगु बिचाः प्वंकीगु ग्वसाः दु ।
थुगुसी स्वंगू राजनीतिक प्रस्तावयात क्वय्या तहलय् तक हे यंकाः सहलह ब्याकेगु न्हूगु अभ्यास माओवादीं शुरु याःगु खः। न्हापा अलग्ग प्रस्ताव महसे अध्यक्षया प्रस्तावय् हे थःपिनि बिचाः प्वंकाः उकियात हे संशोधन यानाः पारित याइगु खः ।
