युथफोर्सया आक्रमणं पोखराय् तनाव
येँ (सन्ध्या टाइम्स)/एमालेया युवा दस्ता युथ फोर्सया नेता विवेक पौडेलया नेतृत्वय् वःगु छगू पुचलं स्ववियू दुजः लगायत प्यम्ह विद्यार्थीयात आक्रमण याःगु खँयात कयाः थौं पोखराया इन्जिनीयरिङ्ग अध्ययन संस्थान तनावग्रस्त जूगु दु ।
खुकुरी, छुरा, भाला व मेमेगु घरेलु ल्वाभः ज्वनाः वःगु उगु पुचलं स्ववियूया दुजः ज्ञानेन्द्र कनौली, विद्यार्थीत अशोक गहतराज, दामोदर घिमिरे व बीईया इन्ट्रास परिक्षाया फारम भरे याःवःम्ह बुद्धिसागर पराजुलीयात घाःपाः याना बिउगु खः। घाःपाः जूपिं मध्ये गहतराज व पराजुलीया अवस्था गम्भीर जुयाच्वंगु दु ।
उगु घटनायात कयाः पश्चिमाञ्चल इन्जिनीयरिङ्ग अध्ययन संस्थानया स्वतन्त्र विद्यार्थी युनियन व एकीकृत माओवादीया भातृ संगठन अखिल क्रान्तिकारीं विज्ञप्ति पिथँसें विरोध याःगु दु। विज्ञप्तिइ घाःपाः जूपिंत वासः यायेगु नापं दोषीयात कारवाही यायेत माग यानातःगु दु। घटनाया कारणं क्याम्पसय् ब्वनेज्या प्रभावित जूगु दु ।
