माओवादी पाखें अनमिनया म्याद थप यायेगु प्रस्ताव
एकीकृत नेकपा (माओवादीं) नेपाः स्थित राष्ट्र संघीय मिसन अनमिनया म्याद थप यायेगु प्रस्ताव सरकार समक्ष तःगु दु । थौं सुथय् माओवादी अध्यक्ष पुष्पकमल दाहाल 'प्रचण्ड' सहितया नेतात प्रधानमन्त्री निवास बालुवाटरय् थ्यंकाः थुगु प्रस्ताव तःगु खः ।
नेपाली कांग्रेस लगायत दलया नेतातय्सं अनमिनया भूमिका प्रति असन्तुष्टि प्वंकूसें म्याद थप याये मज्यूगु खँ धयाच्वंगु इलय् माओवादीं थ्व प्रस्ताव तःगु खः । प्रधानमन्त्री नापया खँल्हाबंलाय् माओवादी नेतातय्सं अनमिनया भूमिका शान्ति प्रकृया पूमवंतल्लेया निंतिं आवश्यक जूगु खँ न्ह्यथंसें अनमिनयात मखुगु द्वपं लगे यानाच्वंगु प्रति नं असन्तुष्टि प्वंकूगु खः ।
उगु हे बैठकय् नेपालीं सेनां ल्वाभः व सेनाया मंकाः अनुगमन समिति (जेएमसीसी)या बैठक बहिष्कार याःगु बारे सरकारया आधिकारीक धारणा नं फ्वंगु दु । सेनां जेएमसीसीया बैठकय् न्हूगु भर्तीयात नं एजेण्डा कथं दुथ्याकातःगु धासें बैठक बहिष्कार याःगु खः ।
