स्वंगूलिं प्रतिवेदन अध्ययनया निंतिं केन्द्रीय दुजःतय्त
एकीकृत नेकपा (माओवादी)या केन्द्रीय समितिया बैठकय् स्वंगूलिं प्रतिवेदनत अध्ययनया निंतिं दुजःतय्त ब्यूगु दु । पार्टी अध्यक्ष पुष्पकमल दाहाल 'प्रचण्ड', वरिष्ठ उपाध्यक्ष मोहन वैद्य 'किरण' व मेम्ह उपाध्यक्ष डा. बाबुराम भट्टराईं पेश यानादीगु ब्याग्लं ब्याग्लं प्रतिवेदन बिहीवाः च्वंगु केन्द्रीय बैठकय् दुजःतय्त अध्ययन यायेत ब्यूगु खः ।
तर उगु प्रतिवेदन धाःसा दुजःतय्सं पार्टी ज्याकू दुने हे अध्ययन यायेमाःगु दु । ज्याकू पिने यंकाः अध्ययन यायेगु इलय् प्रतिवेदन मखुपिं मनूतय् ल्हातय् ल्यायेफइगु धासें ज्याकू दुने हे अध्ययन याकूगु खँ धाःगु दु ।
बुधवाःया बैठकय् अध्यक्ष प्रचण्डं वर्तमान राजनीतिक अवस्था व पार्टीया भावी रणनीति दुथ्याकातःगु प्रतिवेदन न्ह्यब्वयादीगु खःसा निम्ह उपाध्यक्षत वैद्य व भट्टराईं उकी दक्वं खँ दुथ्याकामतःगु धासें थःथःगु मेगू हे प्रतिवेदन पेश यानादीगु खः । प्रतिवेदनय् कन्हय् निसें केन्द्रीय दुजःतय्सं थःथःगु बिचाः प्वंकीगु ज्याझ्वः दु ।
