इतिहासविद् भुवनलाल प्रधान मंत
येँ (सन्ध्या टाइम्स)/नांजाःम्ह इतिहासकार नापं संस्कृतिविद् भुवनलाल प्रधान थौं मंत ।
९० दँ दुम्ह प्रधान ताः ई न्ह्यवंनिसें जलसेँ (किड्नी) सम्बन्धी ल्वचं पीडित जुयाच्वंम्ह खः। २००७ सालया क्रान्तिइ नं महत्वपूर्णगु भूमिका म्हितादीम्ह प्रधानया संस्कृति व इतिहास सम्बन्धी छगू दर्जनं मल्याक सफू पिदनेधुंकूगु दु ।
वय्कःया पिदनेधुंकूगु सफूत बाल ज्ञान, शाक्य जातिया इतिहास, नेपाली संस्कृति छपुलु, स्वयम्भु, कीर्तिपुण्य महाविहार आदि महत्वपूर्ण जू। देय्या राष्ट्रिय संवत् नेपाल संवत् बारे आः तकया दुने दकलय् दुग्यंक अनुसन्धान यानाः आपालं तथ्य पित हयेगु ज्याय् वय्कःया ज्वः मदुगु योगदान दु। थ्व बारे आधिकारिक च्वसुत नं वय्कलं हे च्वयादीगु दु ।
मदुम्ह प्रधानयात अन्तिम श्रद्धाञ्जली प्वंकेत थौं न्हिनय् २ बजे वय्कःया हे छेँ बबरमहलय् शव तया तइगु व वयां लिपा सिथं यंकीगु खँ सीम्ह वय्कःया छेँजःपिंसं कनादीगु दु। प्रधानया कलाः व निम्ह काय दी। नांजाःम्ह साहित्यकार भिक्टर प्रधान वय्कःया हे काय खः। श्रद्धांजलि प्वंकेत वय्कःया छेँय् साहित्यकार, भाषासेवी नापं थीथी दलया नेतात नं थ्यनेधुंकूगु दु ।
फनिन्द्रलाल प्रधानया नामं नं म्हसिउम्ह भूवनलाल प्रधान ने. सं. १०४२ स येँया कमलाक्षी त्वालय् जन्म जूम्ह खः। नेपाःया इतिहास व बुद्ध धर्मय् विशेष रुचि दुम्ह विद्वान प्रधानं आपालं पदक, विभुषण त्याकेगुया नापं छगू इलय् सरकारय् मन्त्री तकं जुयादीधुंकूगु दु ।
