हाकनं द्वँचिन लँय् लँय् फोहोर
येँ (सन्ध्या टाइम्स)/नुवाकोट ओखरपौवाया ल्याण्डफिल्ड साइटय् स्थानियवासीतय्सं पंगः थना बिउगुलिं येँय् हानं फोहोरया समस्या शुरु जूगु दु। थाय्थासय् फोहोर मुनाः नवयाच्वंगु दुसा म्हिगः सापारुया फोहोर नं अन हे थपे जुयाः समस्या अझ तच्वयाच्वंगु दु ।
वा वइगु व हाकनं निभाः त्वइगु थ्व इलय् फोहोर इलय् हे मुना यंके मफुत धाःसा महामारी जुइ फइगु खतरा अप्वयावःगु दु ।
वंगु प्यन्हु न्ह्यवंनिसें ल्याण्डफिल्ड साइट बन्द जुयाः येँय् फोहोर मुनाच्वंगु खः। ल्याण्डफिल्ड साइटया स्थानीयवासीतय्सं लजगाःया माग तयाः अन फोहोर वाके मबिउगु खः। स्थानीयवासीया मेमेगु फुक्क माग पूरा जुइधुंकूगु दुसां रोजगारीया माग पूरा मजूगुलिं उमिसं लँ पनाः फोहोर वाके मबिउगु खँ येँ महानगरपालिकाया वातावरण विभाग प्रमुख रविनमान श्रेष्ठं कनादीगु दु।
