भ्वँतय् प्रजापति समाजया मुँज्या
भ्वँत (सन्ध्या टाइम्स)/राष्ट्रिय प्रजापति समाज भ्वँत, पन्ति, धौख्यः व नालाया मंकाः मुँज्या शनिवाः भ्वँतया चण्डेश्वरी द्यःयाथाय् जुल। भ्वँतया लाय्कूनिसें स्थानीय पन्तिया परम्परागत महाकाली प्याखं पिकयाः चण्डेश्वरी तक थ्यंकूगु उगु मुँज्याय् वंगु बैशाखं निर्वाचित जूपिं राष्ट्रिय प्रजापति समाजया केन्द्रीय पदाधिकारीपिंत हनेज्या नं याःगु खः। उगु हे ज्याझ्वलय् भ्वँत, पन्ति, धौख्यः व नालाया प्रजापति समुदायपाखें थुगुसी एसएलसी पास जूपिं विद्यार्थीतय्त राष्ट्रिय प्रजापति समाजया नायः गणेशराम प्रजापतिं हनापौ देछानाः हनेज्या यानादिल ।
राष्ट्रिय प्रजापति समाज भ्वँत लागाया अध्यक्ष मत्स्यनारायण प्रजापतिया सभापतित्वय् जूगु उगु ज्याझ्वलय् ज्याझ्वःया मूपाहां नापं केन्द्रीय पदाधिकारीपिंत अध्यक्ष मत्स्यनारायण प्रजापतिं खादा क्वखायेकाः हनेज्या यानादीगु खः। बनेपा एकाईया विष्णु प्रजापतिं लसकुस यानाः न्ह्याकूगु उगु ज्याझ्वलय् राष्ट्रिय प्रजापति समाजया नायः गणेशराम प्रजापतिं थःगु जातियात थःपिसं गौरव तायेकेमाःगु खँ कनादिल। ज्याझ्वलय् राष्ट्रिय प्रजापति समाजया न्वकु न्हुछेबहादुर प्रजापतिं वइगु भाद्र १२ गते सनिवाः केन्द्रीय परिषद जुइगु खँ कनादिल ।
