सहमति बिपरित न्वमवायेत सभासदतय् इनाप
आरोप प्रत्यारोप मयायेत इनाप
बिहिवाः व्यवस्थापिका संसदया बैठकय् न्ववासें सभासदतय्सं दक्व दलतय् सहमतिया विकल्प मदुगु खँ धासें सहमति बिपरीत न्वमवायेत इनाप यानादिल । दलया शिर्षस्थ नेतातय्सं हे सहमति विपरित न्ववायेगु यानाच्वंगु दुखदपूर्ण जूगु धासें न्हूगु संविधान निर्माण मजुतल्ले दलत दथुइ आरोप-प्रत्यारो मयायेत इनाप याःगु दु । सभासदतय्सं बुधवाः प्रधानमन्त्री पुष्पकमल दाहाल प्रचण्डं संसदय् प्वंकादीगु प्रतिबद्धता कार्यान्वन याना दलत दथुइया स्वापू क्वातुके माःगु खँय् बः बियादिल ।
बैठकय् माओवादीया सभासद झक्कु प्रसाद सुवेदी, कांग्रेसया दीपकुमार उपाध्याय, एमालेया मोहमद अनसारी, मालेया जनककुमारी चालीसेलगायत सभासदतय्सं न्ववानादीगु खः । अथेहे जनककुमारी चालीसे, शान्ता चैधरी व लक्ष्मी परियारं ललितपुरया कलीकुमारी थापायात दुरव्यवहार याम्ह प्रध्यानाधापक विमला थापायात भविष्यतकं अयोग्य ठहर जुइ कथं जागीरं बरखास्त यायेत माग याःगु दु ।
बैठकय् विधायन समितिया सभापति यशोधा गुरुङ सुवेदीं घरेलु हिसां कसुर व सजाय विध्येक व स्वास्थ्यकर्मी व स्वास्थ्य संस्था सुरक्षा विध्येक २०६२ सम्बन्धि समितिया प्रतिवेदन सहितया विध्येक पेश यानादिल । अथेहे कानुन न्याय व संविधानसभा व्यवस्था मन्त्री देवप्रसाद गुरुङं लगानी बोर्ड नेपाल बिद्युत्त नियमण आयोग व विद्युत विध्येक २०६५ पेश यानादिल ।
व्यवस्थापिका संसदया मेगू बैठक ६गते स्वताः ईलय् सःतुगु दु ।
