सरकार गठन जुइमफुगु दुर्भाग्यपूर्ण : गृहमन्त्री
गृहमन्त्री भीम रावलं न्हूगु सरकार गठन जुइमफयाः देय् छगूलिं प्रभावित जूगु खँ धयादीगु दु । वय्कलं ताः ई तक नं सरकार गठन जुइमफुगु धइगु तःधंगु दुर्भाग्यपूर्ण जूगु धयादिसें थुकीया कारणं हे शान्ति सुरक्षाया स्थितइ नं लिच्व लानाच्वंगु खँ धयादिल ।
बिहीवाः सुथय् महानगरीय प्रहरी प्रभाव बुद्धनगरया उल्लेज्या यानादिसें न्हूगु सरकार गठन मजुगूलिं पूर्ण बजेट पेश यायेमखंगु व उकीं शान्ति सुरक्षाया अवस्था प्रभावकारी जुइमफुगु धयादिल । नियमित रुपं असारय् हे बजेट पास जूगु खःसा विशेष सुरक्षा नीति कथं ज्या न्ह्यानावनीगु धयादिसें मन्त्री रावलं बजेट पेश मजूगुलिं शान्ति सुरक्षा प्रभावित याःगु दावी यानादिल ।
एमालें संसदय् जुयाच्वंगु प्रधानमन्त्रीया निर्वाचनय् तटस्थ च्वनाः देय्यात अनिर्णयया बन्दी दयेकाच्वंगु धापू प्रति असहमति प्वंकादिसें रावलं प्रधानमन्त्री माधवकुमार नेपालं राजीनामा बीवं समस्या समाधान जुइ धइगु माओवादीया अडानं देय्यात अनिर्णयया बन्दी दयेकाच्वंगु द्वपं बियादिल ।
