खुसिबा व चलखं झिंछम्ह सीत, देय्न्यंकया जनजीवन प्रभावित
देय्या थीथी थासय् मदिक्क वा वयाः वंगु खुसिबालं व चलखं ल्हानाः झिंछम्ह मनूत सीगु दुसाः देय्न्यंया जनजीवन प्रभावित जूगु दु । खुसिबा व चलखं ल्हाना उदयपुरय् ४म्ह, दाङय् २म्ह व रुकुम, डडेलधुरा, स्याङ्जा, पाँचथर व तेह्रथुमय् छम्ह-छम्ह सीगु दु ।
उदयपुरय् त्रियुगा खुसिइ वःगु खुसिबालं चुइकाः जोगदह-८ मैनाहा छेँ जुम्ह बाबाजी भिखारी दास सीगु दु । दास जोगदही-२ पारिटोलय् दुगु रामजानकी देगःया कुटीया बाबाजी खः । अथेहे तपेश्वरी-९य् २म्ह व हडिया-४य् छम्ह सीम्ह लुसां इमिगु नां सीकेमफुनीगु खँ जिल्ला प्रहरी ज्याकू उदयपुरं धाःगु दु ।
मदिक्क वाः वयाः वःगु खुसिबालं डडेलधुरा बगरकोट गाविसया १४दँया मुकेश साउद सीगु दु । उखे तेह्रथुमय् खुसिबालं चुइकूपिं स्वम्ह मध्ये छम्हेसिया सीम्ह लुइकूगु दुसाः निम्ह अझ नं बेपत्ता जुयाच्वंगु खँ धाःगु दु ।
अथेहे दाङय् वंगु चान्हय् खुसिं चुइकाः सैघा-१ बलकोटीया ३५दँ दुम्ह इन्द्रबहादुर दमाई सीगु दु । उखे धःलय् क्वबाना हलवार-७ लामी दमारया ४दँया पुष्पा वाली सीगु दु । रुकुमया लाक्चा गाविसय् च्वंगु पितिबङ नं खुसिं चुइकाः बंधवाः चान्हाय् छम्ह सीगु दु । सीम्हेसिया सनाखत जुइमफुनी ।
स्याङ्जाया बिर्घाय् धाःसा छखाः छेँ दुनाः ३९दँया ताराबहादुर माझी सीगु दुसाः पाँचथरया फक्तेपय् ब्वनेकुथीं छेँ लिहांवयाच्वंगु इलय् चलखं ल्हानाः ११दँया पृती नेम्वाङ सीगु दु ।
