प्रचण्ड, वैद्य व बाबुरामया बिस्कं बिस्कं प्रतिवेदन
थनिंनिसें न्ह्याःगु एनेकपा (माओवादी)या केन्द्रीय समितिया बैठकय् पार्टी अध्यक्ष पुष्पकमल दाहाल
'प्रचण्ड' व उपाध्यक्षत मोहन वैद्य 'किरण' व डा. बावुराम भट्टराईं बिस्कं बिस्कं राजनीतिक प्रतिवेदन पेश याःगु दु ।
अध्यक्ष प्रचण्डं धौख्यःया मिराबेल होटेलय् वनाः तयार याःगु प्रतिवेदनय् दक्वं खँ दुथ्याकामतःगु धासें उपाध्यक्षद्वय वैद्य व भट्टराईं बिस्कं बिस्कं हे प्रतिवेदन लःल्हाःगु खः । अतिकं गोप्य तयातःगु प्रचण्डया प्रतिवेदनय् वैदेशिक हस्तक्षेप अप्वःगु व उकीया हे कारणं संसदं प्रधानमन्त्री ल्ययेमफुगु खँ दुथ्याकातःगु खँ सीदुगु दु । नापं प्रचण्डं स्वंगू 'स' सतक, सदन व सरकारं संघर्ष न्ह्याकेमाःगु खँय् बः बियातःगु दु ।
उखे उपाध्यक्ष वैद्यया प्रतिवेदनय् धाःसा क्रान्ति अझ नं पूमवंगु धासें जनविद्रोह यायेमाःगु खँ न्ह्यथंनातःगु दुसाः मेम्ह उपाध्यक्ष भट्टराईया प्रतिवेदनय् राजनीतिक दलत नाप थप सहलह यानाः राजनीतिक गतिरोध ज्यंकेमाःगु खँ धयातःगु दु ।
बुधवाः पार्टी मू ज्याकू कोटेश्वर पेरिस डाँडाय् न्ह्याःगु बैठकं स्वंगूलिं प्रतिवेदनयात दुथ्याःका न्हूगु कार्यदिशा तयार याइगु ज्याझ्वः दु । माओवादीया मेगू बैठक कन्हय् सुथय् ११ बजे च्वनीगु ज्याझ्वः दु ।
