थनिंनिसें दलतलिसे एमालेया सहलह
येँ (सन्ध्या टाइम्स)/नेकपा (एमाले)पाखें राष्ट्रिय सहमतिया आधार पौ धकाः संविधानसभाय् दुथ्याःगु नीन्यागुलिं दलतय्त बिउगु पौयात कयाः थनिंनिसें दलया नेतातलिसे वार्ता न्ह्याकेत्यंगु दु ।
थ्व झ्वलय् थौं सनिलय् नेपाली कांग्रेसया नेतातलिसे सहलह ब्याकीगु जूगु दु। कांग्रेसया केन्द्रीय ज्याकू सानेपाय् हे च्वनाः एमालेया वरिष्ठ नेतातय्सं थ्व सहलह ब्याकेत्यंगु खः। थौं कांग्रेसलिसे वार्ता याये धुंकाः वयां लिपा मेमेगु पार्टीतलिसे नं निरन्तर वार्ता न्ह्याका यंकेगु खँ धाःगु दु ।
एमालेया पोलिटब्यूरों तयार याःगु राष्ट्रिय सहमतिया उगु अवधारणा पौयात कयाः मेमेगु दलतलिसे नं सहलह ब्याकेगु निंति अध्यक्ष झलनाथ खनाल, प्रधानमन्त्री माधव नेपाल, वरिष्ठ नेता केपी ओली व महासचिव ईश्वर पोखरेल दुथ्याःगु छगू वार्ता पुचः नं गठन यानातःगु दु। आः थ्वहे पुचलं फुकलिसे वार्ता याइ ।
एमालें फुक्क दलतय्त बिउगु उगु आधारपती नं सहमतिया हे लिधंसाय् न्ह्याः वने फइगु खँ धयातःगु दुसां उकियात कयाः सुनां नं टिप्पणी धाःसा याःगु मदुनि ।
