माओवादी केन्द्रीय कमिटीया बैठक
पार्टीया पद्धति व प्रणाली बारे सहलह
येँ (सन्ध्या टाइम्स)/एकिकृत माओवादीया थनिंनिसें च्वंगु केन्द्रीय कमिटीया बैठकय् पार्टीया पद्धति व प्रणाली लगायत छगू दर्जन थीथी एजेण्डाय् सहलह जुइत्यंगु दु।
माओवादीं 'अभिब्यक्तिइ स्वतन्त्रता: निर्णय कार्यान्वयनया सवालय् एकरुपता' धइगु लाइन पास यानातयेधुंकूगु जूसां उकियात ब्यवहारय् लागू यायेगु सवालय् धाःसा मतभिन्नता दुगुलिं पार्टीया पद्धति व संचालन प्रणाली सवालय् ठोस खँ क्वःछीगु निंतिं केन्द्रीय कमिटीया बैठक च्वंगु खः। थुगु खँयात मेपिंसं धाःसा माओवादी दुने अन्तरविरोध चर्के जूगु धइकथं ब्याख्या याना हयाच्वंगु खँ छम्ह केन्द्रीय दुजलं 'सन्ध्या टाइम्स'यात कनादिल ।
थौंया बैठकय् न्हूगु संविधान निर्माण, मिथिला राज्य समितिया ७२ म्ह दुजःतय्सं राजीनामा बिउगु, भारतया पुलांम्ह विदेशी सचिव श्यामशरण नेपाः वःगु इलय् पार्टी दुने ब्वलंगु कचवं आदि लगायत झिंछगू थीथी विषयय् ब्यापक रुपं सहलह जुइगु खँ माओवादी सूत्रं धाःगु दु। लिसें न्हूगु सरकार व एमालें छ्वयाहःगु प्रस्ताव बारे नं बैठकय् सहलह जुइ। थुगुसी एजेण्डा यक्व दुगुलिं केन्द्रीय कमिटीया मुँज्या भचा ताःहाकः जुइफुगु खँ नं धाःगु दु।
म्हिगः हे च्वने धयातःगु थ्व बैठकया लागिं तयारी मगाःगुलिं थौं जक च्वनेत्यंगु खः। बैठकय् पार्टी अध्यक्ष प्रचण्डं थःपिनि राजनीतिक प्रतिवेदन पेश यायेधुंकाः केन्द्रीय कमिटीया दुजःतय्सं थःथःगु खँ तयादी ।
