चलखं ल्हानाः छखा हे छेँया स्वम्ह बेपत्ता
मदिक्क वा वयाः जनजीवन प्रभावित
येँ (सन्ध्या टाइम्स)/निन्हु न्ह्यवंनिसें मदिक्क वयाच्वंगुलिं वां यानाः देय्या थीथी थासय् चलः वंगु दुसा आपालं थासय् खुसिबाः वयाः क्षति जूगु दु। वां यानाः देय्न्यंक जनजीवन प्रभावित जूगु दु ।
थ्व हे झ्वलय् मदिक्क वा वयाः थौं सुथय् ताप्लेजुङया सादेवा धइगु थासय् चलखं ल्हानाः छखा हे छेँया स्वम्ह मनू बेपत्ता जूगु दु। थौं सुथय् चलः वनाः अनया चेप्टेभीरय् च्वंपिं आताहङ लिम्बु, वय्कःया कलाः व छम्ह छय् बेपत्ता जूगु दु। चलखं उमिगु छेँ छखां ल्हाःगु खः ।
स्थानीयबासीं उद्धार यायेगु ज्या यानाच्वंगु दु। वा मदिक्क हे वयाच्वंगुलिं उद्धार यायेगु ज्याय् नं समस्या ब्वलनाच्वंगु दु। उगु हे लागाय् मानबहादुर सेलिङया छेँ नं चलखं ल्हाःगु दु। सेलिङया छेँ ल्हाःसां मानवीय क्षति धाःसा मजूगु खँ प्रहरीं धाःगु दु ।
कन्हय् तक वा वइ
मौसम पूर्वानुमान महाशाखां कन्हय् तक मदिक्क हे स्वनिगलय् वा वइ धाःगु दु। थुगुसी मनसुन लिबाक जक थ्यंकः वःगु कारणं आः वा वयाच्वंगु खँ धासें महाशाखां थौं न्हिछि चछि छझाः दिउसां कन्हय् तक मदिक्क हे वा वइगु अनुमान याःगु दु। महाशाखां बिउगु जानकारी कथं थज्याःगु वा देय्न्यंकं हे समान रुपं वयाच्वंगु दु ।
