थौं क्वाति त्वनेगु नखः

येँ (सन्ध्या टाइम्स)/थौं देय्न्यंकंया नेवाःतय्सं गुंपुन्हि नखः हनाच्वंगु दु। थ्व झ्वलय् नेवाःतय् क्वाति त्वनेगु याइ। क्वाति दायेकाः त्वनीगु जुयाः थुगु नखःयात क्वाति नखः नं धायेगु याः। नेवाःतय्सं जक मखु लिपांगु इलय् वयाः स्वनिगलय् च्वंपिं मेमेगु जातिया मनूतय्सं नं क्वाति त्वनेगु याना हःगु दु। गुताजि बूबः तयाः क्वाति दायेकी। अथे हे सिनाज्या क्वचायेधुंकूपिं नेवाःतय्सं थौं हे बुँइ वनाः ब्यांजा नकः वनी। गुंपुन्हिया हे झ्वलय् थौं यलया बुंगय् मतयाः जुइसा किपुली चछि हे बाहाः चाःहिलेगु याइ। अथे हे यलया कुम्भेश्वर पुखुली द्यःखः जात्रा यानाः पूजा याइगु चलन दु। उगु हे कथं सिलु तिर्थय् वनाच्वंपिं मनूतय्सं थौं हे स्नान याइ ।