भुटानय् नं परिवर्तन याकनं हे वइ : कोइराला
नेपाली कांग्रेसया सभापति व पुलांम्ह प्रधानमन्त्री गिरिजाप्रसाद कोइरालां विश्वयंक परिवर्तनया फेय् वयाच्वंगु व थुकीं झी नापं च्वंगु हिमाली देय् भुटानयात नं याकनं हे थीगु खँ धयादीगु दु ।
बिहिवाः येँय् भुटानी शरर्णार्थी अधिकारकर्मी नेता टेकनाथ रिजालं च्वयादीगु सफू बिमोचन यायेगु ज्याझ्वलय् न्ववानादिसें वयेकलं भुटानय् परिवर्तन याकनं वइगु व उकीं प्रजातन्त्र स्थापना याइ धयादिल । वयेकलं शरणार्थीतय्त स्वंगूगु देय् छ्वयाः समस्या समाधान मजुइगु धासें भुटानी शरणार्थीतय्सं देय् लिहांवनेत आन्दोलन न्ह्याकातुं च्वनेमा धयादिल । पुलांम्ह प्रधानमन्त्री कोइरालां भुटानी शरणार्थीतय्त देय् लिहांछ्वयेत भारतया ग्वहालि महत्वपूर्ण जुइगु खँ धासें भारतया ग्वहालि याइगु अपेक्षा यानादिल ।
ज्याझ्वलय् न्ववानादीसें एमालेया वरिष्ठ नेता माधवकुमार नेपालं अन्तराष्ट्रिय पहलया कमि व दये दुनेया दवाव मगागुलिं भुटानी शरणार्थी छेँय् लिहांवने मखंगु धयादिल । अथेहे नेकपा एकीकृत (माओवादी)या नेता सिपी गजुरेलं शरणार्थी समस्या समाधान यायेत भारतं ग्वहालि मयाःगु द्वपं बियादिल ।
