नेपाल नागरिक उड्डयन प्राधिकरणया पत्रकार सम्मेलन
नेपाल नागरिक उड्डयन प्राधिकरणं खराब मौसमया हुनिं विमान दुर्घटना जूगु जानकारी ब्यूगु दु । दुर्घटना लिपा नागरिक उड्डयन प्राधिकरणं येँ याःगु पत्रकार सम्मेलनय् प्राधिकरणया निमित्त प्रमुख त्रिरत्न मानन्धरं खराब मौसमया हुनिं दुर्घटना जूगु धयादिल । येँ नं लुक्लाया निंतिं ब्वःगु विमान मौसम खराबीया हुनिं अवतरण याये मफयेवं येँ लिहाँवःगु खः ।
विमानय् अमेरिकाया प्यम्ह, जापान व बेलायतया छम्ह-छम्ह नागरिक दु । क्याप्टेन लक्ष्मणप्रकाश विक्रम सिंहया नेतृत्वय् सहचालक सोफिया सिंह व परिचारिका सहारा शेर्पा दुगु खः । दुर्घटनाय् सीपिं नेपाःमि पी. शेर्पा, ए. राई, पी. भोटे, प्रकाश अमगाई व ईश्वर रिजाल खः । अथेहे बेलायतया टी. जेरीमाई, जापानया वाई हायासी व अमेरिकाया एच. फिन्च, के. फालोन, आई. सेखेट्स व एल कार्डोसो खः । सुथय् च्यातात्या इलय् माओवादीया मकवानपुर जिल्ला सेक्रेटरीं खबर यायेवं विमान दुर्घटना बारे जानकारी वःगु प्राधिकरणं धाःगु दु ।
थ्वहे दथुइ सुर्खेत विमानस्थलं खाद्यान्न ज्वनाः जुम्ला वनाच्वंगु निगः बिमान दुर्घटना जुइगु पाखें बचेजूगु दु । मकालू एयरया नाइन-एन-ए-जे-जी बिमान व एयर काष्ठमाण्डपया नाइन-एन-ए-आइ -जी जेड बिमान दुर्घटना जुइगु पाखें बचेजूगु खः । मकालु एयरया लिउनेया भेन्टीलेशनया लुखा चालेवं व काष्टमण्डपया बिमानया लुखा तिइ ल्वमंगुलिइ दुर्घट्नाया खतरा जूगु खः । निगुलिं विमान ब्वःगु छुं ई लिपा हे आपतकालिन अवतरण याःगु खः । विमानया लुखा छाय् गुकथं चाल धैगु खँय् छानविन जुयाच्वंगु नागरीक उडड्यन ज्याकू सुर्खेतं धाःगु दु । आः निगलं विमानया हवाई उडान सुरक्षा विभागं उडान स्थगन याःगु दु ।
