थौ एमालेया बैठक, कन्हय् माओवादीया
वर्तमान राजनीतिक अवस्थाया बारे सहलह यायेत नेकपा (एमाले)या पोलिटब्यूरो बैठकं थौ च्वने त्यंगु दु । छुं ई न्ह्यः केन्द्रीय कमिटिया बैठकं प्रधानमन्त्रीया निर्वाचन लगायतया विषयलय् निर्णय यायेमफेवं कमिटिया बैठकया एजेण्डा क्वःछीगु जिम्मा पोलिटब्यूरो बैठकयात ब्यूगु खः । थौं एमालेया मू ज्याकू बल्खुइ च्वनीगु बैठकं न्याक्वःगु खुसी नं प्रधानमन्त्रीया निर्वाचन पाखें प्रधानमन्त्री ल्ययेमफुगु बारे, सहमतिय सरकारया कुतः नापं केन्द्रीय कमिटिया बैठकया एजेण्डा बारे सहलह याइगु जूगु दु ।
उखे थौं हे च्वनीगु धाःगु एनेकपा (माओवादी)या केन्द्रीय समितिया बैठक कन्हय् तकया निंतिं लिछ्याःगु दु । मंगलवाः च्वंगु माओवादी पदाधिकारीतय् बैठकं तयारी मगाःगु धासें केन्द्रीय समितिया बैठक बुधवाः तकया निंतिं लिछ्याःग खः । केन्द्रीय समितिया बैठकय् अध्यक्ष पुष्पकमल दाहाल 'प्रचण्डं' राजनीतिक प्रतिवेदन न्ह्यब्वयादीगु ज्याझ्वः दुसाः उगु बैठकं हे राष्ट्रिय भेलाया एजेण्डा नं क्वःछीगु ज्याझ्वः दु ।
