थौं न्याक्वःगु चुनावं नं प्रधानमन्त्री ल्यये मफइगु
येँ (सन्ध्या टाइम्स)/प्रधानमन्त्री माधव नेपालं राजीनामा बियादीगु न्यय्न्यान्हु लिपा थौं संसदय् प्रधानमन्त्रीया नितिं न्याक्वःगु चुनाव जुयाच्वंगु दु ।
थौंया चुनावय् नं माओवादी अध्यक्ष प्रचण्ड व कांग्रेस नेता रामचन्द्र पौडेल दथुइ धेधेबल्लाः जुइ। थौं नं एमाले व मधेशवादी दलत तटस्थ च्वनीगु जूगुलिं थौंया चुनावं नं न्हूम्ह प्रधानमन्त्री ल्यये फइगु अवस्था मदु। एमालें ला आधिकारिक रुपं हे तटस्थ च्वनेगु घोषणा यायेधुंकूगु दुसा मधेशवादी मोर्चां औपचारिक रुपं तटस्थ च्वनेगु मधाःनि।
थौं मंकाः मुँज्या च्वना तटस्थ च्वनेगु धकाः घोषणा याइपिं मधेशवादी मोर्चाय् दुथ्याःगु प्यंगू दलमध्ये मधेशी जनअधिकार फोरम व नेपाल सद्भावना पार्टी माओवादीयात मत बीमाः धइगु पक्षय् दुसा तमलोपा व मधेशी जनअधिकार फोरम लोकतान्त्रिक नेपाली कांग्रेसयात मत बीमाः धइगु पक्षय् दु ।
