सेना समायोजन संविधान निमार्ण यायेत पूर्व सर्त : प्रम
प्रधानमन्त्री पुष्पकमल दाहाल प्रचण्डं सेना समायोजन व माओवादी सेना व्यवस्थापनलिपा जक संविधान निर्माण ज्या सरल तरिकां न्ह्याः वनीगु खँ धयादीगु दु । प्रधानमन्त्री प्रचण्डं धयादिल - 'थुकीया निंतिं सेना समायोजनयात सरकार प्रमुखता बीया न्ह्याः वनाच्वंगु दु ।'
बिहिवाः महिला आधारशीला नांगु संस्थां ग्वसाःग्वःगु 'न्हूगु संविधानय् महिला व बालबालिकाया सरोकार' विषयक ज्याझ्वलय् न्ववानादिसें वयेकलं दक्वस्यां थःगु धायेफूगु संविधान निर्माण यायेगु ज्या सरकारया निंतिं प्रमुख हाथ्या जूगु खँ धयादिल । आः निर्माण जुइगु न्हूगु संविधान २०४७या थें मजुइगु धासें वयेकलं दक्विस्यां भावनाया कदरयासें थःगु धाये फइगु संविधान निर्माण जुइ धयादिल ।
वयेकलं जनताया संविधान निर्माण यायेत मिसाः व मस्तय् अधिकार दुथ्याकेमाःगु खँय् बः बियादिसें थुकीयात न्हूगु संविधानय् संस्थागत यायेमाःगु खँ कनादिल । देय् ऐतिहासि परिवर्तन पाखे न्ह्याः वनाच्वंसां छुं पक्षत देय्यात न्हापाया अवस्थाय् यंकेत स्वयाच्वंगु कनादिल ।
ज्याझ्वलय् न्ववानादिसें राष्ट्रिय महिला आयोगया नकीं नैनाकला राई नं न्हूगु संविधानय् छुं नं भेदभाव मयासें मिसत व मस्तय् अधिकार दुथ्यामाः धयादिल । अथेहे वयेकलं देशय् विध्यमान दक्वं पक्षपाति कानुन त खारेज यायेत माग यानादिल ।
