कांग्रेसय् राष्ट्रवादीतय् स्वंगूगु धार
येँ (सन्ध्या टाइम्स)/न्ह्यःने वयाच्वंगु कांग्रेसया महाधिवेशनय् सुशील कोइराला व शेरबहादुर देउवा पुचलं सभापति पदय् ल्वायेगु धकाः तयारी यानाच्वंगु इलय् लाक्क स्वंगूगु धारया रुपय् हानं मेगु छगू पुचः न्ह्यःने वःगु दु। थुकिया नेतृत्व धाःसा पुलांम्ह कांग्रेस नेता भीम बहादुर तामांगं यानादीगु दु। म्हिगः छगू ज्याझ्वःया दथुइ तामांगं थःपिनि उम्मेदवारी घोषणा यानादीगु खः।
लिसें म्हिगः हे पार्टी महामन्त्री पदय् नरहरि आचार्यं नं थःगु उम्मेदवारी घोषणा यानादीगु दु। तामांगं थः छुं नं कथंया गुट दयेकाः वयाम्ह मखु धाःसां वय्कःयात नरहरि आचार्य पुचलं समर्थन याइगु अनुमान दु ।
थुगु धारं नेपाली कांग्रेस दुने गणतन्त्र व संघीय व्यवस्थाया पक्षय् दकलय् न्हापां वकालत यानागु धकाः दावी याना वयाच्वंगु दु। थ्व पुचलय् गगन थापा, प्रदिप गिरि आदिपिं नं दुथ्याः। माओवादीं गणतन्त्रया लाइन हयाच्वंगु इलय् वय्कःपिंसं हे आः कांग्रेस नं गणतन्त्रया लाइनय् मवँसें मगाः धकाः पार्टी दुने वहस न्ह्याकादीगु खः ।
थुगुसी थीथी जिल्लाय् जुयाच्वंगु कांग्रेसया अधिवेशनं अप्वः यानाः न्हूगु पुस्तायापिं कार्यकर्तात त्याना वःगु दु। अधिकांश न्हूगु पुस्ता न्हूगु नेपाः व न्हूगु सोचया पक्षय् दु। थ्वपाखें हे उत्साहित जुयाः थ्व पुचलं थःपिंसं नं उम्मेदवारी बीगु धकाः सुरसार याना हःगु खः। निगूगु जनआन्दोलनया इलय् नं आचार्य, थापा, गिरियात पार्टीया ल्याय्म्ह कार्यकर्तातय्सं हे समर्थन याःगु खः ।
