मन्त्रीपरिषदया बैठकं राज्य पुर्नसंरचना आयोग गठन
मन्त्रीपरिषदया बिहिवाः च्वंगु बैठकं राज्य पुर्नसंरचना आयोग गठन याःगु दु । सिंहदरवारय् सुथय् च्वंगु बैठकं डा. गणेशमान गुरुङया अध्यक्षताय् राज्य पुर्नसंरचना आयोग गठन याःगु दु । आयोगय् मिसाः दुजः कथं सीता थेवे दुसाः सत्ता साझेदार दल पाखें छम्ह छम्ह दुजः दुथ्याइ । मेपिं दुजःतय् नां सम्बन्धित पार्टीतय्सं नां बीधुंका आयोगयात पूर्णता बीगू खँ सरकारया प्रवक्ता सूचना तथा संचारमन्त्री कृष्णबहादुर महरां कानदिल ।
राज्य पुर्नसंरचना आयोग गठन यायेमाःगु माग थीथी दल व जातिय पुचलं तःहाकगू ई न्ह्यः निसें यानावयाच्वंगु खः ।
बैठकं देय्या निस व पीगूलिं निर्वाचन क्षेत्रय् सेवाकेन्द्र स्थापना यायेगु निर्णय याःगु दु । थ्वस्वयां न्ह्यः छुं थासय् जकः सेवाकेन्द्र स्थापना यायेगु निर्णय बिवादय् लाःगु खः । सेवाकेन्द्र स्थापना यायेगु धासां थाय् धासाः स्थानीय तहया सहलह लिपा तिनि क्वछी ।
अथेहे बैठकं तराई-मधेश लोकतान्त्रिक पार्टी लगायतया माग सम्बोधन यायेगु निर्णय याःगु दु । नापं बैठकं तमलोपां ल्ह्वनाच्वंगु कपिलवस्तुय् हत्या जुम्ह मोहित खाँया हत्या सम्बन्धी मुद्दाय् गम्भीर प्रकृतिया बाहेक मेगू मुद्दा लितः कायेगु निर्णय याःगु दु । अथेहे संवैधानिक व कानुनी परामर्शलिपा मन्त्रिपरिषदया मेगू बैठकं मुख्य दलया परिभाषा याइगु खँ प्रवक्ता महरां कनादिल ।
अथेहे समाज कल्याण परिषदया उपाध्यक्षय् दाताराम खनाल, कोषाध्यक्षषय् रत्नगाहा मगर व दुजःलय् डा. शिवाङ शेर्पायात नियुक्त याःगु दु । नापं कानुन सुधार आयोगय् निलाउदासी खनाल, देवनारायण यादव व शान्तिकुमारी राईया मन्त्रिपरिषदं नियुक्त याःगु दु ।
बुटवलय् एमालेया कार्यकर्ता प्रचण्ड थैवया हत्यालिपा एमालेया मन्त्रीतय्सं मन्त्रिपरिषदया बैठक बहष्कार यानावयाच्वंगु खः । बिहिवाःया बैठक स्वाः लिपा च्वंगु खः ।
