खुगू दललिसे सभामुखया सहलह
येँ (सन्ध्या टाइम्स)/संविधान सभाया नायः सुवास चन्द्र नेम्वाङं थौं संविधानसभाय् दुथ्याःगु मूमू स्वंगू दल नापं मधेशवादी स्वंगू दलया शीर्ष नेतातलिसे सहलह ब्याकीगु जूगु दु ।
वय्कलं एकीकृत माओवादी, नेपाली कांग्रेस, एमाले, मधेशी जनअधिकार फोरम, तराई मधेश लोकतान्त्रिक पार्टी, मधेशी जनअधिकार फोरम लोकतान्त्रिक व सद्भावना पार्टीया शीर्ष नेतातय्त नापलाना मंकाः कथं सहलह ब्याकादीगु जूगु दु ।
सभामुख नेम्वाङं प्रधानमन्त्री माधव कुमार नेपालं राजीनामा बीधुंकूगु अवस्थाय् ताः ई न्ह्यवंनिसें कामचलाउ सरकार जक जुयाच्वंगु, अन्यौलता ब्वलनाच्वंगु नापं राजनीतिक गतिरोध ब्वलनाच्वंगु विषयसं सहलह ब्याकादीगु खँ धाःगु दु ।
अथे हे कन्हय् जुइगु न्याक्वःगु प्रधानमन्त्रीया चुनावयात कयाः नं दलतय्त सहमति हयेगु कुतः यायेत अले कन्हय् नं न्हूम्ह प्रधानमन्त्री ल्यये मफुत धाःसा छु गथे यानाः न्ह्याः वनेगु धइगु खँय् दलया शीर्ष नेतातलिसे सहलह ब्याकेत थौं सनिलय् सभामुख नेम्वाङं सिंहदरवारय् च्वंगु थःगु ज्याकुथी दलया नेतातय्त सःतादीगु खः ।
