नेपाली सेनायात विकास निर्माण ज्याय् सक्रिय याकेमाः : अर्थमन्त्री
अर्थमन्त्री व नेकपा माओवादीया वरिष्ठ नेता डा. बाबुराम भट्टराई नं नेपाली सेनायात विकास निर्माण ज्याय् सक्रिय याकेमाःगु खँ धयादीगु दु ।
सेनां निर्माण याःगु कालिकोट-जुम्ला खण्ड सतक निरीक्षण याः वनेगु झ्वलय् सुर्खेत विमानस्थलय् संचारकर्मीतनाप खँल्हानादीसें वयेकलं नेपाली सेना नापं जनसेनायात नं नापं विकास निर्माणया ज्याय् लगे यासाः सेना समायोजनया ज्या अपूइगु बिचाः प्वंकादिल । नेपाली सेनां निर्माण याःगु सतकया सरहाना यासें मन्त्री भट्टराईं अधिकाशं सेनाया जवानत इमान्दार जूगु व सेनायात ब्यूगु जिम्मेवारी पूरा यायेत सक्षम जूगु खँ कनादिल । वयेकलं छुं उच्च सैनिक अधिकारीतय्सं यानाः सेना बदनाम जूगु धासें छुं भचाः सेनां यानाः दक्वसितं वहे मिखां स्वये मज्यूगु खँ धयादिल ।
रक्षामन्त्री रामबहादुर थापा 'बादल' व भौतिक योजना मन्त्री विजयकुमा गच्छेदार नापं निरीक्षणय् झायादिम्ह अर्थमन्त्री भट्टराई नं नेपाली सेनां निर्माण याःगु कालिकोट-जुम्ला सतक, छिन्चु-जाजरकोट सतक नापं प्रस्तावित बाजुरा मार्तडीभारी-रारा-गमगढी सतक, कोरेली-नाग्म सतक व रिम्ना-डोल्पा यानाः पोखरा सतकया निरीक्षण यानादी ।
