नरहरि पाखें महामन्त्रीया निंतिं उम्मेदवारी

नेपाली कांग्रेसया केन्द्रीय दुजः नरहरि आचार्यं पार्टीया झिंनिक्वःगु महाधिवेशनय् महामन्त्री पदया निंतिं उम्मेदवारी घोषणा यानादीगु दु । वय्कलं सभापति पदया निंतिं उम्मेदवारी घोषणा यायेगु चर्चा जुयाच्वंगु इलय् थौं पार्टी ज्याकूथी छगू पत्रकार सम्मेलन यानाः महामन्त्रीया निंतिं उम्मेदवारी घोषणा यानादीगु खः ।

पत्रकार सम्मेलनय् वय्कलं पार्टी निगू खेमाय् विभाजित जुयाच्वंगुलिं दक्वसितं एकतावद्ध रुपं न्ह्याकेत थम्हं उम्मेदवारी बियागु धयादिल । थ्वसिवें न्ह्यः झिंछक्वःगु महाधिवेशनय् सभापति पदय् वय्क मदुम्ह गिरिजाप्रसाद कोइराला नाप पराजित जुयादीगु खः ।

वय्कया हे प्यानल पाखें कांग्रेस नेता भीमबहादुर तामाङं सभापति पदया निंतिं उम्मेदवारी घोषणा यानादीगु दु ।