महामन्त्री गुरुङया धापू व्यक्तिगत : कांग्रेस
नेपाली कांग्रेसया महामन्त्री कुलबहादुर गुरुङं प्रधानमन्त्रीया निर्वाचन पाखें कांग्रेसं थःगु उम्मेदवारी लितकायेमा धाःगु धापू वय्कया व्यक्तिगत जूगु खँ नेपाली कांग्रेसं धाःगु दु । आइतवाः सुथय् पार्टी कार्यवाहाक सभापति सुशील कोइरालाया महाराजगंज स्थित छेँय् च्वंगु पदाधिकारी व केन्द्रीय दुजःतय् मंकाः बैठकं उगु खँ धासें प्रधानमन्त्रीया निर्वाचनं उम्मेदवारी लितमकायेगु निर्णय याःगु दु ।
महामन्त्री गुरुङं शनिवाः छगू ज्याझ्वःलय् सहमतिया लँपू मालेत कांग्रेसं थःगु उम्मेदवारी लितकायेमाःगु खँ धयादीगु खः । कांग्रेसं माओवादीयात आःया अवस्थाय् विश्वास यायेमफइगु धासें माओवादीं न्हू विकल्प मबीकं उम्मेदवारी लितमकायेगु निर्णय याःगु दु ।
प्रधानमन्त्रीया निंतिं न्याक्वःगु पटक कन्हय् निर्वाचन जुइत्यंगु दु । थ्वस्वयां न्ह्यः प्यक्वः तक जूगु निर्वाचनय् कांग्रेसया उम्मेदवार रामचन्द्र पौडेल व माओवादीया उम्मेदवार पुष्पकमल दाहाल 'प्रचण्ड' निम्हेसिनं स्पष्ट बहुमत खाकेमफुगु खः ।
