ओलीया झिंखुम्ह दुजलं 'क्याम्प' हिल
येँ (सन्ध्या टाइम्स)/एमाले स्थायी समितिया दुजः केपी ओली पक्षधर झिंखुम्ह केन्द्रीय दुजःतय्सं 'क्याम्प' हिलाः अध्यक्ष झलनाथ खनालया क्याम्पय् वंगु दु। क्याम्प हिउपिं केन्द्रीय दुजःत मुकुन्द न्यौपाने, प्रदिप नेपाल, पृथ्वी सुब्बा गुरुङ, काशिनाथ अधिकारी, गंगालाल तुलाधर, नागेन्द्र चौधरी, छविलाल, वेदुराम भुषाल, रघुवीर महासेठ, विष्णु रिजाल व पशुपति चौलागाइ खः धाःगु दु ।
लिपांगु इलय् वयाः माओवादी लगायत मेमेगु दलया नेतातय्सं नं झलनाथ खनालया लाइनयात अप्रत्यक्ष रुपं समर्थन यानाहःगुलिं आःया अवस्थाय् राष्ट्रिय सहमतिया हे सरकार माः धइगु तायेकाः ओलीया झिंखुम्ह केन्द्रीय दुजःतय्सं झलनाथ खनालया लाइनयात समर्थन याःगु खँ धाःगु दु ।
वंगु छुं दिं न्ह्यः च्वंगु केन्द्रीय कमिटीया बैठकं प्रधानमन्त्री चुनावय् तटस्थ च्वनेगु धकाः याःगु निर्णययात ओली पक्षधर झिंच्याम्ह दुजःतय्सं जक नोट अफ डिसेन्ट च्वयाः विरोध याःगु खः ।
पोलिटब्यूरोय् ओलीया दुईतिहाइ
प्रधानमन्त्री चुनाव बारे सहलह ब्याकेत कन्हय् एमाले पोलिटब्यूरोया बैठक च्वनेत्यंगु दु। मुक्कं ४१ म्ह दुजः दुगु पोलिटब्यूरोय् केपी ओलीया पक्षय् दुई तिहाइ बहुमत दु। प्रधानमन्त्री चुनावय् तटस्थ च्वनेगु धकाः केन्द्रं यानातःगु निर्णय हीकेत कन्हय् पोलिटब्यूरों दवाव बिउसां निर्णय हे हीके धाःसा फइ मखु धाःगु दु ।
