माओवादी सरकार दयेकेत ज्ञानेन्द्रया जिलाजं
येँ (सन्ध्या टाइम्स)/छुं दिं न्ह्यः जक नेपाली जनता दलय् दुहां वंम्ह पुलांम्ह जुजु ज्ञानेन्द्रया जिलाजं राजबहादुर सिंह माओवादी नेतृत्वय् सरकार दयेकेगु अभियानय् खुले जुयाः दु ।
थुगु अभियानया झ्वलय् भारतया प्रधानमन्त्री मनमोहन सिंह नापलायेत वय्कः दिल्ली वंगु खँ सीदुगु दु। सिंहं दिल्लीइ प्रम मनमोहन सिंहयात नापलानाः नेपालय् माओवादी नेतृत्वय् सरकार दयेकेगु लकस ब्वलंकेत इनाप याइगु खँ सूत्रं धाःगु दु। भारतीय समाचार संस्था 'इन्डो एसिएन न्यूज सर्भिसं' जारी याःगु समाचार कथं ज्ञानेन्द्रया जिलाजं राजबहादुर म्हिगः दिल्ली थ्यंगु दु। वय्कः नापं नेपाली जनता दलया नायः हरिचरण साह नं दिल्ली वंगु दु। नेपाली जनता दल नं माओवादीया नेतृत्वय् सरकार दयेकेमाः धकाः सक्रिय जुयाच्वंगु दु। सिंहयात वंगु वालय् तिनि प्रहरीं ज्वनाः चछि कुना हःगु खः ।
दिल्लीइ थौंकन्हय् शाहकालीन मन्त्री गोरे बहादुर खपाङ्गी नं थ्यनाच्वंगु खँ भारतीय सञ्चार माध्यमतय्सं धाःगु दु ।
