सहमति व सहकार्यया विकल्प मदु : प्रधानमन्त्री

तहाकःगू गतिरोध लिपा सदन सुचारु

प्रधानमन्त्री पुष्पकमल दाहाल प्रचण्डं थीथी उतारचढाव जुसां दलत दुथुइया सहमति, सहकार्य व एकताया विकल्प मदुगु खँ धयादीगु दु ।

सत्ता साझेदार दल नेकपा एमाले नापं प्रतिपक्षी दलत नेपाली कांग्रेस व तराई-लोकतान्त्रिक पार्टीत नाप जूगु लिप्पांगु सहमतियात सरकारया पाखें व्यवस्थापिका संसदय् प्रतिबद्धता प्वंकूसें वयेकलं थाकूगु व हाथ्याया दथुइ संविधान निर्माण व शान्ति प्रकृयायात निष्कर्शय् थ्यंकेत थः अझ नं दृढ जूगु धयादिल ।

वयेकलं न्हूगु व पुलांगु तथा अग्रगामी व प्रतिगामी बिचाःया दथुइ मतभेद व टकराव खनेदइगु स्वभाविक जूगु धासें संक्रकमणकालय् जूगु थंज्याःगु थाकूगु ज्या खँयात थम्ह स्वभाविक ढंग कयाःगु खँ धयादिल । वयेकलं दलतय्सं ल्ह्वंगु विषय व जूगु सम्झौताया बारे जानकारी ब्यूसें दक्वसित सहमति व कानुन कथं हे हल यायेगु धयादिल ।

प्रम दाहालं अन्तरिम संविधानया धारा १३९या २ नं व्यवस्थाया कथं स्थानीय निकाय गठन यायेगु जानकारी ब्यूसें दलीय सहमतिइ स्पष्ट राष्ट्रिय नीति देयेका सहिद घोषणा यायेगु धयादिल । वयेकलं कांग्रेसं प्रमुख रुपं ल्ह्वना वयाच्वंगु छेँ बूँ कब्जा यानातःगु लित बीगु विवरण सार्वजनिक यायेगु नं धयादिल । वयेकलं वाईसीएलया नियन्त्रणय् दुगु सार्वजनिक व व्यक्तिगत सम्पत्ति अधिकांस लितबिधुंकूगु धासें ल्यंदनीगु नं याकनहे कार्यान्वन यायेगु धयादिल ।

वयेकलं बजेटया दुरुपयोग मजुइगु प्रतिबद्धता प्वंकूसें युवा स्वरोजगार ज्याझ्वयात नं दलीय सहमति कथं हे न्ह्याः यंकेगु खँ धयादिल । स्वतन्त्र न्यायपालिकाया सम्मान यायेगु प्रतिबद्धता प्वंकूसें वयेकलं निजामति कर्मचारी प्रशासनय् नं नियमावली व कानुन कथं हे सरुवा बढुवा यायेगु धयादिल ।

बुटवलय् हत्यायाम्ह एमाले कार्यकर्ता प्रचण्ड थैव व कोटेश्वरया व्यवसायी रामहरी श्रेष्ठ, संचारकर्मी उमा सिंहया हत्याय् संलग्नयात कारवाही यायेगु धासें कानुनयात ल्हाते काईपिं न्ह्याम्ह जुसां कारवाही जुइगु धयादिल । दण्डहीनताया अन्त्य मजूगुलिं सरकार चिन्तित जूगु व शान्ति सुरक्षा सुदृढ यायेत राजनीतिक दल व नागरिक समाजया ग्वहालिया अपेक्षा यानादिल

वयेकलं संसदय् फिनल्यान्ड व नर्वेया भ्रमणया उपलब्धि बारे नं जानकारी बियादीगु खः ।

प्रधानमन्त्रीया सम्बोधन लिपा व्यवस्थापिका संसदया बैठक सुचारु जूगु खः । प्रधानमन्त्रीया संम्बोधनया माग यासें प्रमुख प्रतिपक्षी कांग्रेस व सत्तारुढ दल एमालें थ्व स्वयां न्ह्यः सदन बहिष्कार यानावयाच्वंगु खः । संसदया मेगू बैठक बिहिवाः न्हिनय् स्वताः ईलय् च्वनी ।