शान्तिदीप यात्रा शुरु
चीनया सांघाईलय् जुयाच्वंगु वर्ल्ड एक्स्पो २०१०या निंतिं शान्तिदीप यात्रा शुरु जूगु दु । एक्स्पोलय् शान्तिदीप ब्वयेगु ताः तयाः न्ह्याःगु यात्राया बुधवाः परर्राष्ट्रमन्त्री सुजाता कोइरालां लुम्बीनिलय् उल्लेज्या यानादीगु खः । शाक्यमुनी बुद्ध नेपालय् हे जन्म खः धकाः प्रचार यायेगु ताः तयाः शान्तिदीप एक्स्पोलय् यंकेत्यंगु खः । यात्रा लुम्बीनिं पाल्पा, स्याङ्जा, पोखरा जुयाः भदौ ५ गते येँ थ्यनी । अथेहे उकीयात ७ गते हवाइमार्ग जुयाः सांघांई यंकेगु ज्याझ्वः दुसाः १८ गते निसें नेपाः पेभिलियनय् तइगु ग्वसाः दु ।
शाक्यमुनी बुद्ध नेपालय् हे जन्म जूगु यथार्थ खयां नं थुकिया बारे यक्व भ्रम दनिगुलिं शाक्यमुनी बुद्ध नेपालय् जन्म जूगु खः धकाः विश्वया न्ह्यःने क्यनेत थुगु शान्तिदीप एक्स्पोलय् यंकेत्यनाःगु खँ इप्लिमेन्टिङ एक्सपर्ट ग्रुपं धाःगु दु । 'मञ्जुपतन' नां छुनातःगु नेपाः पेभिलियनय् शान्तिदीप ब्वइगु न्हि कुन्हु निसें थुकीयात 'शान्तिमण्डप' कथं नं नां छुइगु जूगु दु ।
