सरकारय् एमालेया नेतृत्व परिवर्तन जुइगु सम्भावना मदु : उपप्रम गौतम
उपप्रधानमन्त्री व नेकपा एमालेया उपाध्यक्ष बामदेव गौतमं सरकारय् एमालेया नेतृत्व परिवर्तन जुइगु सम्भावना मदुगु खँ कनादीगु दु । एमालेया छुं सभासदतय्सं थःगु पार्टीया मन्त्रीतय्सं प्रभावकारी ज्या मयागुलिं सरकारय् एमालेया नेतृत्व परिवर्तन यायेमाः धाःगु धापूया प्रतिवाद यासें मन्त्री गौतमं सरकारय् दुथ्यापिं मन्त्रीतय्सं ज्या मयासें अथें च्वनाच्वंगु प्रमाणित यायेत थःगु हे पार्टीया सभासदतय्त हाथ्याः बियादीगु दु ।
बुधवाः पोखराय् जुइत्यंगु अखिल नेपाल किसान महासंघया छगू ज्याझ्वलय् ब्वतिकायेत झायादिम्ह मन्त्री गौतमं ज्याझ्व न्ह्य: पत्रकारत नाप खँल्हानादिसें धयादिल - 'सुयां निगाहा व चाकडिं मन्त्री जुयागु मखु । मन्त्री हिलेगु खँ म्हगसया लडडु जक खः ।'
मन्त्री गौतमं जनभावना कथं ज्या यायेमफूगु खँ धाःसाः स्वीकार यानादिल । वयेकलं माओवादीं सत्ताया दुरुपयोग याःगु व निरन्तरता बियाच्वंसाः भिंमजुइगु चेतावनी बियादिल । वयेकलं एमाले सरकारय् वनेधुंका ८० निसें ८५ प्रतिशत अपराधित कानुनी दायराय् ह्येधुनागु तर राजनीतिक संरक्षण दुगुलिं १५ निसें २० प्रतिशतया ज्वने मफूगु दाबी यानादिल । बुटवलय् युथफोस्रया दुजः प्रचण्ड थैवया हत्यारायात कानुनी दायराय् ह्येगु लक्ष्य पू वनीगु वयेकलं विश्वास प्वंकादिल ।
मंगलवाः एमाले संसदीय दलया बैठकय् पार्टीया मन्त्रीत लित सःतेत सभासदतय्सं माग याःगु खः ।
