थौं सिंहदरवार न्ह्यःने गृहमन्त्रीया पुत्ला च्याकीगु
येँ (सन्ध्या टाइम्स)/नेपाल आदिवासी जनजाति महासंघया आह्वानय् थौं सनिलय् आदिवासी जनजातितय्सं सिंहदरवारया दक्षिण गेटय् धर्ना च्वनीगु ज्याझ्वः दु ।
वंगु ३० गते देय्न्यंकं चक्काजाम याःगु इलय् प्रहरी प्रशासनं ब्यापक हस्तक्षेप याःगु विरोधय् थौं सिंहदरवारय् धर्ना च्वनेगु ज्याझ्वः दयेकूगु खः। जनजाति महासंघया महासचिव आङकाजी शेर्पां थौं गृहमन्त्री भीम रावलया राजीनामा माग यासें सिंहदरवार पिने धर्ना च्वनेत्यनागु जानकारी बियादिल। वय्कलं थौं धर्नाया झ्वलय् हे अघोषित रुपं गृहमन्त्रीया पुत्ला नं च्याकेगु तयारी जुयाच्वंगु जानकारी नं बियादिल ।
थ्वहे झ्वलय् जनजाति महासंघं आः स्वलाया निंतिं जागरण अभियानया रुपय् आन्दोलन याइगु जूगु दु। म्हिगः च्वंगु महासंघया मुँज्यां स्वलाया आन्दोलन व अभियानया खाका तयार याःगु दुसा उकियात छुं दिं लिपा जक सार्वजनिक याइगु खँ धाःगु दु ।
