सहमति जूसा एमाले नेतृत्व स्वीकार : गुरुङ
एनेकपा (माओवादी)या नेता देव प्रसाद गुरुङं राष्ट्रिय सहमति जूसा एमालेया नेतृत्व स्वीकार यायेफइगु खँ धयादीगु दु । माओवादीया पदाधिकारीतय् बैठकं राष्ट्रिय सहमतिय सरकारया निंतिं दक्व विकल्प खुल्ला जूगु तर सरकारया नेतृत्व माओवादीं हे यायेमाःगु खँ क्वःछिउगु कन्हय् कुन्हु वय्कया थ्व धापू सार्वजनिक जूगु खः ।
मंगलवाः येँया रिपोटर्स क्लबय् जूगु साक्षात्कार ज्याझ्वलय् नेता गुरुङं कांग्रेसं उम्मेदवारी लितकयाः सहमति जुसाः एमालेयात सरकारया नेतृत्वया निंतिं ग्वाहालि यायेगु धयादिल । वय्कलं तःधंगु दलया हिसाबं माओवादीं हे नेतृत्वया दाबी यायेमाःगु खःसां सहमति जुसाः एमालेयात विना सर्त ग्वाहालि यायेगु धयादिल । तर वय्कलं कांग्रेसया नेतृत्व धाःसा छुं नं हालतं स्वीकार मयायेगु धयादिल ।
ज्याझ्वलय् कांग्रेस केन्द्रीय दुजः कृष्णप्रसाद सिटौलां सरकारय् नापं च्वनाः जक शान्ति व संविधान सुनिश्चित मजुइगु धयादिल । वय्कलं शान्ति प्रकृया पूवंकेत माओवादी सेना समायोजन जुइमाःगु व माओवादी व ल्वाभःया स्वापूयात त्वाःथले माःगु धयादिल । अथे जुइधुंकाः जक माओवादी नेतृत्वया सरकार नं स्वीकार्य जुइगु खँ वय्कलं धयादिल ।
अथेहे एमाले नेता प्रदीप ज्ञवालीं सरकार गठन जक समस्याया समाधन मजुइगु धयादिसें वय्कलं आःया आवश्यकता शान्ति व संविधानया भालाः पूवंकेफुगु सरकार माःगु धयादिल ।
