राष्ट्रिय सहमतिया निंतिं दक्वं विकल्प खुल्ला : माओवादी
एकीकृत नेकपा (माओवादीं) राष्ट्रिय सहमतिया निंतिं दक्वं विकल्प खुल्ला याःगु दु । माओवादीं शान्ति व संविधाया निंतिं राष्ट्रिय सहमति अपरिहार्य जूगु धासें दक्वं विकल्प खुल्ला यायेगु निर्णय याःगु खः ।
माओवादी मू ज्याकू कोटेश्वर पेरिस डाँडाय् सोमवाः च्वंगु माओवादी पदाधिकारीतय् बैठकं राष्ट्रिय सहमति निर्माणया निंतिं एमालेया अध्यक्षयात छपू पौ नं छ्वःगु दु । उकी राष्ट्रिय सहमतिया निंतिं विश्वसनीय आधार निर्माण जुसाः प्रधानमन्त्रीया उम्मेदवारी लित कायेगु खँ न्ह्यथनातःगु दु ।
थ्वस्वयां न्ह्यः एमाले अध्यक्ष झलनाथ खनालं राष्ट्रिय सहमति निर्माणया निंतिं उम्मेदवारी लितकायेत माओवादीयात छपू पौ छ्वःगु खः ।
माओवादीं राष्ट्रिय सहमतिया निंतिं लचकता क्यनेत तयार जूगु खँ धाःसां शान्ति प्रकृया व संसदया बच्छि हिस्सा जूगुलिं माओवादीया हे नेतृत्वय् राष्ट्रिय सरकार गठन जुइमाःगु धासें उकीया लागि पहल यायेगु निर्णय नं बैठकं याःगु दु ।
अथेहे बैठकं माओवादी सभासद् रामकुमार शर्मायात भारतीय राजदूतावासं स्यायेगु धकाः वःगु ख्याच्वःया भत्र्तसना यासें भारतीय दूतावासय् मंगलवाः विरोध पत्र लःल्हायेगु निर्णय याःगु दु । अथेहे ग्याँस मुयाः मदुम्ह सभासद् रामकुमारी यादवया शोक प्रस्ताव नं पारित याःगु दु ।
