सरकार गठन मजूगु हे मू समस्या : झा

उपराष्ट्रपति परमानन्द झां देशय् सरकार गठन जुइमफुगु हे आःया मू समस्या जूगु खँ धयादीगु दु । वय्कलं सरकार गठन लिपा जक संविधान निर्माण व शान्ति प्रकृया क्वचायेफइगु धयादिल ।

साँगाय् च्वंगु महाद्यःया मूर्तिया दर्शन लिपा पत्रकारत नाप खँल्हाबंला यानादिसें वय्कलं देय्यात सरकार बिहीन यायेत संसदय् दुपिं ६०१ सभासद्त व २५ दल दोषी जूगु धयादिल । वय्कलं जनतां थःगु शक्ति ६०१ सभासद्तय्त लःल्हाःगुलिं देय्यात दयेकीगु वा स्यंकेगु जिम्मेवारी सभासद्तय्सं हे कायेमाःगु धयादिल ।

वय्कलं सरकार गठन यायेत मधेशवादी दलतय्सं पंग मथंगु खँ न्ह्यथनादिसें स्वंगू तःधंगु दल मिलेजुसां दक्वं खँ हल जुइगु धयादिल । वय्कलं मिडियां मधेशवादी दलतय्त बदनाम यायेत स्वःगु द्वपं नं बियादिल ।