निम्ह काय सहित आत्महत्या
येँ (सन्ध्या टाइम्स)/गरिब जूगुलिं बझाङय् वंगु चान्हय् निम्ह मचा नापं छम्ह मामं मंकाः कथं आत्महत्या याःगु दु। लेकगांया ३५ दँ दुम्ह सञ्जुदेवी पुजारीं थः निम्ह मस्त ७ दँया हिमाल व ५ दँया सर्वे पुजारीयात ज्वनाः अनया माटे नांगु खुसिइ क्वब्वानाः आत्महत्या याःगु खः ।
मय्जु पुजारीं थ्व सिबें न्ह्यः निक्वः तक आत्महत्याया यायेधुंकूगु खःसां गांयापिं मनूतय्सं बचे याना बिउगु खः। 'थः भाःतं मेम्हलिसे इहिपा याःगुलिं छुं ई तक ला वय्कलं थः मनूतय्के फ्वनाः सन्तानयात लहीगु ज्या याःगु खः' स्थानीय समाजसेवी देवबहादुर पुजारीं धयादिल। भाःतं मेम्हेसित इहिपा याःगु नापं थः गरिब जूगुलिं मस्त लही मफयाः आत्महत्या याःगु जुइमाः धकाः अनुमान याःगु दु। प्रहरी अनुसन्धानय् नं थ्वहे खँ पिहां वःगु दु ।
खुसिइ क्वब्वानाः सीपिं निम्ह मस्त नापं मांम्हेसिया सीम्ह थौं सुथय् थ्यंमथ्यं ४ किलोमिटर क्वय् लुयावःगु खः आत्महत्या याःम्ह पुजारीया भाःत रमेश पुजारी आः तक नं सम्पर्कय् धाःसा मवःगुनिगु खँ धाःगु दु। पुजारी मेम्ह मिसायात इहिपा यानाः वलिसे हे ब्यागलं च्वनाच्वंम्ह खः ।
