भारतीय अपराधी त्वःतेत्यंपिं निम्ह प्रहरी जनताया कब्जाय्
येँ (सन्ध्या टाइम्स)/स्थानीय जनतां ज्वंम्ह छम्ह भारतीय अपराधीयात छुं हे कारवाही मयासे भारतयात लःल्हायेत्यंगु विरोधय् नवलपरासीया स्थानीय जनतां अनया छगू प्रहरी चौकीइ आक्रमण यानाः अन च्वंपिं निम्ह प्रहरीयात नियन्त्रणय् काःगु दु। स्थानीय जनतां थ्व प्रहरी लगायत उमिगु पेस्तोल नापं थःपिनि नियन्त्रणय् कयातःगु खँ धाःगु दु ।
नवलपरासीया गुरिया गाविसय् रुपेन यादव नांया छम्ह भारतीय अपराधीयात म्हिगः स्थानीय जनतां ज्वनाः प्रहरीयात बुझे याःगु खः। तर प्रहरीं उमित छुं कारवाही हे मयासे भारतयात लःल्हायेत्यंगु खनाः तम्वःपिं स्थानीय जनतां प्रहरी चौकी हे घेरे यानाः अन च्वंपिं प्रहरीत बद्री यादव व करिम गुलाम नांया निम्ह प्रहरीयात थःपिनि नियन्त्रणय् काःगु खः। थौं सुथय् तकं प्रहरी व उमिगु पेस्तोल स्थानीय जनताया कब्जाय् लानाच्वंगु दु। थुकिं यानाः उगु लागाय् तनाव ब्वलंगु खँ धाःगु दु ।
स्थानीय जनतां भारतीय अपराधी नापं उमित त्वःतेत्यंपिं नेपाःया प्रहरीयात समेत कारवाही यायेमाः धकाः माग यानाच्वंगु दु ।
